BISMILLAHIRRAHMANIRRAHIM
Alhamdulillah, wabiham dihi
Wafeuet nabi ,saidil ambia
Soenyang deungoe, wafeuet nabi
Tuhan neubri ,le that pahala
Sang katamat, tuboeh nabi
Deungon tangan, jaroe dua
Bak si uroe, troen jibrai
U bak nabi ,nyang mulia
Ya Rasulullah ,saleuem tuhan
Ajai datang ,katroh masa
Hana treb le, ya janjogan
Woe bak tuhan, nanggroe baka
Ban neudeungo, kheuen jibra i
Neumoe nabi ,rheut ie mata
Kheun jibra I, ya jangjongan
Mantoeng sayang, akan donya
Ya maulana, that yuroilan
Ulon pandang, rhet ie mata
Jaweub nabi ,lon syuroilan
Bukon sayang, lon keu donya
Hana sayang ,keu fatimah
Keu ainsyah, hana lon kira
Amren hasan ,hana lon chen
Amren husen ,han lon cinta
Abu bakar tan, lon ingat
Han lon minat ,keu judonya
Umar usman ,hana cintaan
Ali pih tan, ulon cinta
Nyangna sayang that, cit keu umat
Oh lon ingat, rhoet ie mata
Salang na lon, mantoeng disinoe
Geunab uroe dalam dosa
Oh tan ulon saleeh pakri
He ya rabbi , hukom gata
Nyangkeuh nyangna, lon syuroilan
Nyang laen tan , dum perkara
Teuma neuwoe , ya jibrail
Tinggai nabi , nyang mulia
Nabi neuwoe, bak ainsyah
Pakon gundah , ya maulana
Nyang barokon , oh troh keunoe
Ban mata uroe , limpah cahya
Ulon kalon, bak uroe nyoe
Sang ureueng moe, lagee rupa
Teuma sabda , rasulullah
Bak ainsyah, neu calitra
Hai ainsyah, deungo kamoe
Ulon jinoe , katroeh masa
Ulon jinoe , habeh reuzeuki
Katroh wahi, jibrail ba
Troen jibrail, bak uroe nyoe
Jak tueng kamoe , nyawoeng geuba
Allah allah, he ainsyah
Serta bohbah, ngoen ie mata
Ya tuhannku , pakoen meunoe
Tinggai kamoe , nyang that hina
Ureueng lakoe , neuba dilee
Pakri lagee , kamoe dumna
Ya habibi , bak siseun nyoe
Tinggai kamoe, tajak gata
Neulake do’a , ya habibi
Beusigoe matee, sajan gata
Oh tan gata, ya muhammad
Han soe peu ingat, rijang jula
Oh lon ingat , that meusampee
Droeneuh hanle, tinggai hamba
Sabda nabi, bak ainsyah
Janji allah , hana dua
Haroeh kamoe, matee dilee
Gata pihmee, matee juga
Com diteu ot , seumah di gaki
Lon beumate , sajan gata
Lom meusabda, nabi yullah
Bak ainsyah, neucalitra
Meukon habeh, langkah rezeuki
Adak lon nyoe , hanjeut lon ba
Alllah allah , he ainsyah
Kheundak allah , hana dua
Ainsyah deungo, sabda nabi
Narit suci , baknyum rasa
Wahe nabi , po janjongan
Pakri kamoe, oh tan gata
Yohnyan gundah, tuan ainsyah
Allah allah, he saidina
Nabi meuhoi , dumna umat
Deungon siat, hadir dumna
Teuma sabda , nabi muhammad
Nyoe amanat , lon bak gata
Beek lupa allah, deungon nabi
Dum teuh asi , tuha ngon muda
Taseumbahyang, linoeng watee
Dum meutentee , takeurija
Habeeh geudeungo, dumna umat
Neubri bi’at , ngon rahsia
Habeeh biat , ngoen talikin
Muhammad amin , hendak bungka
.....bersambung
Saturday, 2 June 2012
Wafeut Nabi ( oleh: Tgk Diyueb Bruek)
05:40
[KoNoHa]
No comments
0 comments:
Post a Comment